Alþjóðlega brúðulistahátíðin Hvammstangi International Puppetry Festival – HIP Fest – fór fram í annað sinn í byrjun þessa mánaðar, nánar tiltekið dagana 8. til 10. október. Í fréttatilkynningu frá forsvarsmönnum hátíðarinnar komu á hátíðina á þriðja tug erlendra listamanna frá átta löndum sem buðu upp á fjölda sýninga og vinnusmiðja, auk fyrirlestra og kvikmyndasýninga með umræðum við listamennina á eftir.
HIP Fest sé einstök viðbót í menningarlíf landsmanna, enda eina brúðulistahátíð landsins. HIP Fest var valinn menningarviðburður ársins á Norðurlandi vestra árið 2020 og skipuleggjandi hátíðarinnar, Handbendi – Brúðuleikhús, er núverandi Eyrarrósarhafi, en Eyrarrósin eru verðlaun sem veitt eru framúrskarandi menningarverkefni á landsbyggðinni.
Í fyrrnefndri fréttatilkynningu kemur fram að þrátt fyrir verulegar samkomutakmarkanir á hátíðinni í fyrra þá tókst hún einstaklega vel við mikla ánægju þátttakenda og áhorfenda. Brúðulistin er fjölbreytt og fornt listform sem stöðugt haslar sér meiri völl í menningarlífi landsins. Á hátíðinni mátti líta fjölbreyttar sýningar fyrir alla aldurshópa, sem nýta sér öll blæbrigði listformsins.
Til gamans má geta að vefritið ÚR VÖR fjallaði um HIP fest í október á síðasta ári og má lesa allt um það hér: https://www.urvor.is/post/brudulistahatid-a-hvammstanga