Dagana 22. - 23. apríl næstkomandi mun Päivi Vaarula, sýna verk sín í Deiglunni á Akureyri. Päivi er finnskur textíllistamaður sem hefur lagt stund á textíllist í 40 ár og er með meistaragráðu í henni, en hún hefur verið í vinnustofudvöl í gestavinnustofu Gilfélagsins í apríl mánuði og sýnir nú afrakstur vinnu sinnar. Sýningin verður opin frá 14:00 -17:00 báða dagana.
Í fréttatilkynningu frá forsvarsfólki Deiglunnar munu verkin á sýningunni samanstanda af roði sem hún hefur mótað.
„Ég kanna atburði og tilfinningar úr lífi mínu sem hafa haldist undir húðinni. Ég þýði lífið á tungumál textílsins. Markmið mitt sem listamanns er að segja sögur og kanna líf konu. Ég endurspegla tilfinningar, næmi, hugmyndir og viðhorf inn í list mína. Hughrif mín geta breytist hratt og þá fylgi ég eðlishvötinni minni og nýtt inntak skapar nýtt verk.“ er haft eftir Päivi í fréttatilkynningunni.
Í fyrrnefndri fréttatilkynningu kemur fram að þetta sé fimmta listamannadvöl Päivi á Íslandi. Auk þess bjó hún og kenndi verkgreinar og textíl í Hallormsstaðaskóla á árunum 2017-2019. „Þann tíma sem ég hef starfað sem listamaður hef ég verið að rannsaka þær tilfinningarnar sem bærast undir húðinni. Fyrsta viðbragð var að ýta óþægilegum tilfinningum upp á yfirborðið og þá urðu þær ein af annarri jákvæðari og jákvæðari. Ég var að móta fiskileður (roð) og lét efnið tala til mín. Þá þróuðust formin í höndum mínum út frá þeim hugsunum og hugmyndum sem ég hafði.“ segir Päivi.
Þess ber að geta að Päivi sýnir einnig í Mjólkurbúðinni, sal Myndlistarfélagsins á Akureyri, með Ragnheiði Björk Þórsdóttur dagana 14. til 23. apríl og sýninguna nefna þær Teksti- Texti.