Á morgun, fimmtudaginn 3. febrúar, opnar sýning Margrétar Dúadóttur Landmark YOU EITHER DIE A HERO OR LIVE LONG ENOUGH í Gallerí Úthverfu á Ísafirði, en hún er þriðja sýningin í sýningarröðinni MǪRSUGUR 2022. Í tilkynningu frá forsvarsmönnum Gallerí Úthverfu segir að Mǫrsugur sé þriðji mánuður vetrar samkvæmt gömlu misseratali. Mǫrsugur er dimmasti tími vetrarins þegar allur lífsandi liggur í dvala. Til að lýsa upp myrkrið munu fjórir listamenn varpa verkum sínum á glugga Gallerís Úthverfu við Aðalstræti á Ísafirði. Sýningin Mǫrsugur varir í tvo mánuði og sýningar listamannanna standa í 12 daga hver.
Hér að neðan má sjá dagsetningar á sýningum og nöfn listafólks sem sýna í Mǫrsugi í ár:
04.01 - 15.01 Ívar Glói
20.01 – 31.01 Sigrún Gyða Sveinsdóttir
*03.02 - 15.02 Margrét Dúadóttir Landmark*
17.02 - 28.02 Andreas Brunner
Í fyrrnefndri fréttatilkynningu segir að Margrét Dúadóttir Landmark (f. 1996) sé myndlistarkona sem útskrifaðist frá myndlistardeild Listaháskóla Íslands árið 2020 með viðkomu í Koninklijke Academie van Beeldende Kunsten í Hollandi.
Í list sinni raungerir Margrét tengslin á milli tvíræðninar og óáþreifanleikans sem einkennir hugmyndir annars vegar og gegnheilan áþreifanleika skynheimsins hins vegar, sem skapar skondna tilfinningu fyrir holdgervingu hins þversagnakennda sem slíks. Tengsl á milli óræðra hugmynda og fastmótaðs raunveruleika taka á sig hjákátlegar eða ómögulegar birtingarmyndir.
Verk hennar einkennast af ljóðrænum innsetningum og persónulegri sýn á ímyndasköpun í samtímanum.
Verkið YOU EITHER DIE A HERO OR LIVE LONG ENOUGH, er 44 mínútna langt myndbandsverk, sem er unnið út frá hugmyndinni um að eldast og hugmyndum barna um fullorðna. Margrét kemur bæði fram í verkinu sem barn og sem fullorðin kona. Við hvetjum áhugasama um að láta þessa athyglisverðu sýningu ekki framhjá sér fara.