Laugardaginn 1. apríl næstkomandi opnar sýning Unu Bjargar Magnúsdóttur „Svikull Silfurljómi“ í Samkomuhúsi Súðavíkur. Opnun sýningarinnar er klukkan 16:00 og stendur sýningin yfir til sunnudagsins 23. apríl og er opin daglega frá kl. 14:00 til 17:00 og eftir samkomulagi.
Í fréttatilkynningu frá Listasafni ASÍ segir að Una Björg Magnúsdóttir sé fjórði listamaðurinn sem velst til þátttöku í sýningaröð Listasafns ASÍ þar sem skipulagðar eru einkasýningar valinna listamanna á tveimur stöðum á landinu. Listasafn ASÍ býr við ágætan húsakost en er um þessar mundir starfrækt án þess að hafa yfir eigin sýningarsal að ráða. Á meðan þetta tímabundna ástand varir hefur safnið átt gjöfult og gott samstarf við stofnanir, samtök og einstaklinga víðsvegar um landið og skipulagt með þeim sýningar á bæði eldri og nýrri verkum.
Í fyrrnefndri fréttatilkynningu segir jafnramt að Una Björg Magnúsdóttir (f. 1990) nam myndlist við Listaháskóla Íslands og stundaði framhaldsnám við ÉCAL í Sviss þaðan sem hún útskrifaðist árið 2018. Verk hennar hafa verið sýnd meðal annars í Listasafni Reykjavíkur, Gerðarsafni, Y gallerí, KEIV í Aþenu, GES-2 í Moskvu og Nordatlantens brygge í Danmörku.
Una Björg beitir ýmsum brögðum í verkum sínum til að velta upp spurningum um fegurð, gildi, tilvist okkar, hegðun og hátterni. Hún notar til þess áferð og gildishlaðin efni á slunginn en sparlegan hátt. Með nákvæmum uppstillingum á fábrotnum munum skapa verkin ákveðið sýndaryfirborð þar sem allt virðist með felldu. En verkin taka á sig háttvísa blekkingu og dansa á óræðum skilum þess raunverulega og eftirlíkingar til að kalla á óskipta athygli áhorfandans.
Kallað er reglulega eftir tillögum frá myndlistarmönnum sem vilja vinna með safninu og eitt verkefni valið hverju sinni. Sýningarstaðirnir eru valdir í samvinnu við listamennina sem taka þátt og eru til skiptis á höfuðborgarsvæðinu og í öðrum landshlutum.
Staðirnir sem urðu fyrir valinu fyrir sýningar Unu Bjargar Magnúsdóttur eru Súðavík og Mosfellsbær. Í fréttatilkynningunni kemur fram að Una Björg velji sýningarrýmin af kostgæfni og leyfir verkunum á sýningunni að spretta fram sem einhvers konar viðbragð við því sem í rýminu felst. Fyrri sýningin er haldin sem fyrr segir í samvinnu við Samkomuhúsið í Súðavík og seinni sýningin verður haldin í Mosfellsbæ haustið 2023.
Samhliða sýningunum verða haldin myndlistarnámskeið fyrir leik- og grunnskólabörn þar sem unnið er m.a. með elstu verkin í safneigninni og gerðar stuttmyndir fyrir heimasíðu safnsins. Sýningarstjórar sýningarinnar Svikull silfurljómi eru Dorothée Kirch og Elísabet Gunnarsdóttir og hvetjum við áhugasama um að missa ekki af þessari áhugaverðu sýningu.
Comments