Hundar tala, en aðeins til þeirra sem kunna að hlusta.” – Orhan Pamuk.
Í dag, laugardaginn 6. febrúar er sýningaropnun í Listasafni Árnesinga þar sem sýningin Rófurass eftir Bjargeyju Ólafsdóttur opnar. Sýningarstjóri sýningarinn er Jonatan Habib Engqvist og verður opið frá klukkan 12:00 til 17:00 bæði í dag sem og á morgun sunnudaginn 7. febrúar auk þess sem listamannaspjall við sýningarstjórann verður klukkan 16:00 á morgun sunnudag. Sýningin mun síðan vera opin til 23. maí næstkomandi.
Í fréttatilkynningu um sýninguna kemur fram að hún samanstandi af teikningum, ljósmyndum, skúlptúr, kvikmyndum, málverkum og hljóðverkum. Ljós og myrkur leika líka hlutverk, sem kemur fram í myndskeiði frá 16mm filmu og í fósfór-málverkum. Í fyrrnefndri tilkynningu segir að með þessu breytist andrúmsloft verkanna frá því að snúast um hreina gleði yfir í að sýna uggvænlegan andlegan undirtón sem liggur eins og rauður þráður í gegnum sýninguna. Samhliða sýningunni er gefin út bók um sama efni. Samoyed hundarnir sem líkjast nánast draugum – sem upphaflega voru ræktaðir til að veiða, draga sleða, og smala hreindýrum, sjást í kvikmyndinni – og sjást líka aftur og aftur í bókinni.
Allskyns hundar sjást á teikningum, grafíkverkum og ljósmyndum af villihundum í Litháen, af gæludýrum og félögum, og konu með hund innan í líkamanum sínum, sem vill komast út. Því betur sem við kynnumst mannfólkinu, virðist hún segja, því meira elskum við hunda.
Fram kemur í fréttatilkynningunni að Bjargey Ólafsdóttir hafi lært ljósmyndun, málaralist og blandaða tækni í Listaháskóla Íslands og Listaakademíunni í Helsinki, og handritsgerð og leikstjórn í Binger Filmlab í Amsterdam. Hún vinnur í fjölbreyttum miðlum, og verður útkoman oft í formi íronískra verka, stundum ofbeldisfullra eða óhugnanlegra, og sækir hún innblástur í þráhyggjur og fantasíur nútímalífs. Persónurnar í verkum hennar eru gjarnan einstaklingar sem týnast í kunnuglegum en þó framandi aðstæðum. Hún hefur gert nokkrar kvikmyndir sem hlotið hafa lof gagnrýnenda, og hefur sýnt verk sín víða um lönd, t.d. í Ljósmyndasafni Reykjavíkur, Nýlistasafninu í Reykjavík, Kunstverein í München, KunstWerke í Berlín, Galaria Traschi í Santiago, Chile og Färgfabriken Norr í Östersund, Svíþjóð.
Reglum um fjöldatakmarkanir verður framfylgt með talningu gesta. Við hvetjum áhugasama um að kynna sér opnunina og listamannaspjallið um helgina í Listasafni Árnesinga sem er staðsett í Reykjamörk í Hveragerði. Þess ber að geta að ÚR VÖR fjallaði um listasafnið í maí mánuði árið 2019 og hægt er að lesa meira um það hér: https://www.urvor.is/post/listasafn-arnesinga-2019
Texti: Aron Ingi Guðmundsson