Föstudaginn 15. september síðastiðinn opnaði sýning Yoav Goldwein í sal Listasafns Ísafjarðar á annarri hæð í Safnahúsinu Eyrartúni og var sýningin sýnd til dagsins í dag. Sýningin ber nafnið Home – Between a Shelter and a Cage og segir í fréttatilkynningu frá Listasafni Ísafjarðar að hún hafi tekið áhorfandann í ferðalag þar sem myndlist, heimspeki og frásagnarlist blandast saman og úr verður sjónræn innsetning og ferðalag inn á við.
Með ljósmyndun, myndbandi og hljóði þræðir hún saman mismunandi sjónarhorn heimsins og kannar hversu flókið hugtakið heimili er - viðkvæmt samspil tilfinninga, tengsla og væntinga, í stöðugu samspili við kraftmikið umhverfi. Þrátt fyrir þennan vandasama dans, tekst sýningunni að eima blæbrigðaríka hugtakið heimili í heildstæða og aðgengilega víðmynd.
Með sýningunni bauð listamaðurinn áhorfendum að velta fyrir sér þessu flókna, huglæga og líkamlega rými sem við köllum „heimili“.
Í fyrrnefndri fréttatilkynningu segir jafnframt að í listsköpun sinni ber Yoav marga hatta; hann er ljósmyndari, rannsakandi, listamaður, leiðbeinandi, mannfræðingur og heimspekingur. En það að búa til djúpstæða reynslu er kjarninn í listköpun hans. Ástríða hans liggur í því að safna að sér visku, vinna úr henni og deila henni á skapandi og áhrifaríkan hátt. Yoav nýtir sína eigin lífsreynslu í sköpun sinni, en barnæska hans í Ísrael hefur haft mikil áhrif. Leit hans að frelsi hefur teygt sig til bæði líkamlegra og andlegra vídda, og leitt hann á óhefðbundnar brautir með það markmið að komast að sannleikanum um tilveru mannsins.
Svo vitnað sé áfram í fréttatilkynninguna þá kemur fram að undanfarin ár hafi Yoav verið á ferðalag um heiminn til að kafa ofan í óhefðbundinn og mismunandi lífsstíl fólks. Hann byrjaði sem félagsvísindamaður og myndaði fljótt persónuleg tengsl á þeim stöðum sem hann heimsótti. Hann fangar frásagnir, staðsetningar og einstaklinga sem hafa áhrif á hann. Hin djúpstæða innsýn sem fengin var af þessari reynslu, ásamt námi í heimspeki, rann saman í rannsókn á kjarna heimilisins og þessi rannsókn birtist okkur í Listasafni Ísafjarðar sem þverfagleg sýning.