Í dag, nánar tiltekið föstudaginn 8. mars verður opnuð sýning á verkum Bjargar Bábó Sveinbjörnsdóttur í Úthverfu á Ísafirði. Listakonan verður viðstödd opnun sýningarinnar sem ber heitið Ekki gleyma að blómstra og stendur til fimmtudagsins 28. mars næstkomandi. Boðið verður til sérstaks viðburðar við sýningarlok á Páskaviku.
Í fréttatilkynningu frá forsvarsfólki Úthverfu er haft eftir listakonunni: "Af moldu ertu komin og að moldu skaltu aftur verða, en í millitíðinni ertu pottaplanta og það er alltaf eitthvað að. Sýningin er etnógrafía á mannflórunni hið ytra og hið innra sem leitast við að þroskast, blómstra og hámarka sig í samfélagi þar sem bestu útgáfur sjálfsins eru ákjósanlegar og alltaf rétt handan við hornið. Ekki gleyma að slökkva á hellunni og ekki gleyma að blómstra. Fyrir alla muni, reyndu að muna eftir því að vera."
Björg Bábó Sveinbjörnsdóttir starfar jöfnum höndum við listsköpun og kennslu. Hún er menntuð í hagnýtri menningarmiðlun, félags- og kynjafræði og er ein þeirra sem reka Hversdagssafnið á Ísafirði.
Við hvetjum áhugasama um að kynna sér endilega þessa áhugaverðu sýningu sem er styrkt af Ísafjarðarbæ.
Comments