Sunnudaginn 28. mars síðastliðinn opnaði listasýningin „Berskjölduð/Unarmed“ í Listasafni Reykjanesbæjar. Sýningin er samsýning ellefu listamanna sem fanga á ólíkan hátt áskoranir og viðfangsefni í lífinu. Í frétttatilkynningu um sýninguna segir að listafólkið noti eigin sjálfsímynd og reynsluheim sem efnivið og úr því verða til opinská og djörf verk sem við sjálf getum tengt okkur við eða lært af. Sum verkanna sýna úthald og seiglu á meðan önnur fagna mannslíkamanum með húmor og næmni.
Á opnunardaginn sýndi Michael Richardt gjörninginn RED MEAT og stóð gjörningurinn yfir yfir allan daginn. Aðrir sýnendur eru þau Ásdís Sif Gunnarsdóttir, Berglind Ágústsdóttir, Dýrfinna Benita, Egill Sæbjörnsson, Freyja Reynisdóttir, Hildur Ása Henrýsdóttir, Maria Sideleva, Melanie Ubaldo, Michael Richardt, Róska og Sara Björnsdóttir og sýningarstjórarnir eru þau Amanda Poorvu, Ari Alexander Ergis Magnússon, Björk Hrafnsdóttir, Emilie Dalum og Vala Pálsdóttir.
Þess ber að geta að sýningin er verkefni meistaranema í sýningagerð við Listaháskóla Íslands. Opið er alla daga milli klukkan 12:00 og 17:00 og er aðgangur ókeypis. Við hvetjum áhugasama til að kynna sér endilega þessa áhugaverðu sýningu.
Texti: Aron Ingi Guðmundsson