Tónlistarhátíðin Aldrei fór ég suður var haldin með ansi óhefðbundnu sniði síðastliðna páska á tímum samkomubanns vegna Covid 19 faraldsins. Hátíðin, sem haldin hefur verið á Ísafirði á hverju ári 2004, fór fram án áhorfenda í þetta skiptið, en var þess í stað streymt í opinni dagskrá á netinu.
Það er óhætt að segja að vel hafi til tekist og var gaman að sjá hversu einlægur flutningur listafólksins var og hversu heimilislegur bragur var á öllu saman. Hátíðin snerti mann beint í hjartastað og komst undirritaður við nokkrum sinnum á meðan á útsendingu stóð. Okkur fannst tilvalið að fá leyfi hjá rokkstjóra hátíðarinnar, honum Kristjáni Frey Halldórssyni, til þess að deila útsendingu hátíðarinnar hér í vefritinu, hlekkur á útsendinguna er hér.
Við hvetjum alla þá sem ekki hafa enn séð hátíðina hingað til að gefa sér tíma til að kíkja á þetta, viðburður sem þessi yljar manni um hjartarætur á þessum skrýtnu tímum og leggur áherslu á mikilvægi menningar og listar í samfélaginu - góðar stundir.
Aron Ingi Guðmundsson,
ritstjóri ÚR VÖR.