Blábankinn á Þingeyri er enginn venjulegur banki heldur nýsköpunar- og samfélagsmiðstöð þar sem fólk í heimabyggð og víðar getur sótt þjónustu, haft vinnuaðstöðu og aukið þekkingu sína til að auðga atvinnu- og mannlífið í Dýrafirði og nágrenni.
Í fréttatilkynningu frá forsvarsfólki Blábankans segir að nafnið fékk Blábankinn m.a. vegna þess að hann er til húsa í gamla Landsbankahúsinu á Þingeyri sem málað hefur verið blátt. Reyndar sinnir Landsbankinn enn bankaþjónustu í húsinu nokkra klukkutíma í viku en að öðru leyti hýsir Blábankinn samvinnurými þar sem haldnir eru viðburðir og vinnustofur og hið árlega Startup Westfjords, nýsköpunarhemil sem var einmitt á dögunum.
Þá styður Blábankinn við íslenskt og erlent athafnafólk með verkefninu Arctic Digital Nomads en „stafrænn flakkari“ er lífsstíll sem verður æ vinsælli, til lengri og skemmri tíma, og þá sækja ekki allir í sól og hita því mörg sýna því mikinn áhuga að dvelja í Dýrafirði við störf sín og njóta stórbrotinnar náttúrunnar þar í leiðinni.
Auk þess sinnir Blábankinn stafrænni aðstoð við íbúa, þ.e. dagleg notkun tölvu- og snjalltækja, notkun samfélagsmiðla og samskipti við opinberar stofnanir, og er samstarfsaðili við Bókasafnið á Ísafirði.
Blábankinn sinnir því mörgum og mismunandi hlutverkum til að vega upp á móti minnkandi þjónustu stærri aðila við smærri sveitarfélög. Hugmyndin þótti nokkuð djörf á sínum tíma en eftir 5 ára reynslu hefur Blábankinn sannað sig og getur hreykt sér af aðkomu að ýmsum spennandi sprotaverkefnum, bæði í nærsveitinni og víðar.
Þess má geta að vefritið hefur birt nokkrar greinar um Blábankann í gegnum tíðina og má sjá þær í greinasafni okkar.